Co recinto das Lagoas atestado dende primeira hora e un cartel que soubo medir os tempos entre a música de raíz, o pop de grandes estadios e a electrónica de peche, o SonRías Baixas pechou a súa edición máis concorrida reunindo a 33.000 persoas en Bueu. Unha cita que xa non é só un referente no Morrazo, senón a demostración de que se pode xestionar un aforo masivo sen perder a comodidade, a boa visibilidade e a fluidez nos accesos.
La Raíz: o concerto que xa é historia do festival
Se houbo un momento que xustificou por si solo a viaxe a Bueu, ese foi o directo de La Raíz. A Expectativa era máxima e a banda respondeu cun concerto demoledor dende o primeiro acorde. O recinto das Lagoas converteuse nun fervedoiro co público entregado a cada un dos seus hinos nunha actuación que quedará na memoria do SonRías como un dos directos máis multitudinarios e emotivos que se lembran na vila.
Do folclore urbano de Sen Senra ao fenónemo Dani Fernández
A xornada de arranque puxo o foco en propostas que enchen recintos Sen Senra trouxo a Bueu o seu pop elegante e atmosférico, mentres que Dani Fernández firmou un dos momentos máis multitudinarios do festival, poñendo a todo o recinto a corear cada un dos seus estribillos. A noite no escenario principal completouse coa enerxía do pop-rock de Carolina Durante e a versatilidade de Judeline, reafirmando a aposta do festival por reunir nun mesmo espazo a grandes cabezas de cartel con artistas que están a liderar a vangarda do pop estatal.
Mistura de estilos, bo ambiente e sesións de peche
A medida que avanzaron as xornadas, o festival despregou o seu abano máis diverso. As actuacións de Alizzz e Nena Daconte achegaron a cotaxe de pop nostálxico e de autor, nun programa onde conviveron o ritmo festivo, a música urbana e os patróns de baile electrónicos na zona de DJ. O recinto das Lagoas mantivo un fluxo constante entre os dous escenarios, sen grandes aglomeracións nas barras nin colas incomodas, permitindo gozar dos directos con espazo e boa acústica.
O SonRías Baixas volve marchar de Bueu consolidando unha fórmula equilibrada: cartel amplo, contorna costeira inmellorable e unha organización que sabe xestionar a contorna de As Lagoas para que o público só teña que preocuparse pola música.
