Do 24 ao 26 de maio a IX edición do Ourensound Fest fixo vibrar, unha vez máis, a un público entregado ao que nin a choiva, nin o vento nin o cansazo puideron derrotar. Mesmo público fiel e entregado, un cartaz cheo de artistas coñecidos e emerxentes do panorama indie, pero distinto lugar. E é que despois de varias edicións no concello de Bemposta, esta novena entrega celebrouse no Complexo Deportivo de Monterrei, no concello de Pereiro de Aguiar.
O recinto, rodeado de vexetación e árbores e cunha zona de acampada e aparcadoiro contiguas ao espazo de concertos, converteuse durante a fin de semana nunha auténtica festa da música ao aire libre.
Venres 24: a combinación de Arde Bogotá, Fillas de Cassandra e Shinova
A música comezou a sonar xa a partir das 18:30 horas da man dos Bomba Laxe, dando paso logo ao directo de Lain. Sen dúbida, un bo preámbulo para o concerto de Fillas de Cassandra, quen foron recibidas entre os vitores dun público impaciente. O dúo vigués fixo cantar a centos de persoas que se congregaban diante do escenario ao ritmo de temas coma Lisístrata, Varredoras ou Quen é a que canta?. Coa súa mestura de música tradicional, electrónica e reivindicación, puxeron patas arriba o recinto.
Co ambiente xa máis que caldeado, ás 22:30 chegaba a quenda de Shinova. A banda biscaína, liderada por Gabriel de la Rosa, despregou a súa habitual forza e conexión emocional cos fans. Cancións como La sonrisa intacta ou Alas soaron con intensidade, conseguindo un dos momentos máis emotivos e épicos da noite.
O gran prato forte da xornada chegou pasada a medianoite con Arde Bogotá. Os de Cartaxena, convertidos nunha das formacións máis potentes do rock estatal actual, ofreceron un concerto arrollador e sen concesións. O público respondeu con enerxía e contundencia a temas coma Los perros, Abismo ou Cowboys de la A3, nunha actuación impecable e chea de enerxía.
Para pechar a noite, os galegos The Rapants fixeron a súa aparición no escenario para facer bailar a todo o recinto cos seus ritmos disco-indie. A súa enerxía e actitude no escenario foron o broche perfecto para unha primeira xornada inesquecible, que rematou coa sesión de David Van Bylen ás 03:45 da mañá.
Sábado 25: a choiva non logra apagar a enerxía de Sidonie ou Tanxugueiras
A segunda xornada do Ourensound arrancou pola mañá cunha completa programación na zona gastro e sesións vermú. A música non deixou de sonar grazas ás sesións de Ameva DJ, Isaac Pedrouzo e a actuación en directo de La Duendeneta, que animaron o recinto desde ben cedo.
Xa pola tarde, a partir das 18:00 horas, o recinto de concertos volveu abrir as súas portas para acoller os directos de Aria DJ e Técanas. Sen embargo, ás 20:00 horas, a chuvia fixo a súa aparición de forma máis meza, aínda que iso nin moito menos freou os ánimos dos asistentes.
Co chubasqueiro e o paraugas coma mellores aliados, o público recibiu a Sen Senra, quen protagonizou un dos concertos máis íntimos e coidados da fin de semana. O artista galego presentou temas do seu traballo PO2054AZ, creando unha atmosfera envolvente grazas a cancións coma Ya no te hago falta ou Uno de esos gatos.
Ás 22:30 horas chegaba a quenda de Sidonie, que sen dúbida protagonizou un dos directos máis tolos e divertidos da edición. Marc Ros e os seus non dubidaron en mesturarse co público, subir a xente ao escenario e ofrecer un espectáculo incombustible. Himnos coma El incendio, Carreteras infinitas ou CEDÉ puxeron a bailar a todo o recinto baixo a chuvia.
A festa continuou coa enerxía arrolladora de Tanxugueiras. O trio galego fixo tremer Monterrei cos seus ritmos de folclore e electrónica, poñendo a cantar a miles de persoas con temas coma Terra, Desidia ou Averno.
A recta final da noite estivo cargada de ritmo e festa coa actuación de Carlos Ares, o directo de Cala Vento —que ofreceron unha descarga de rock potente e sen artificialidades— e a sesión de Galician Army, que mantiveron a pista acesa ata ben entrada a madrugada.
Domingo 26: festa familiar para pechar unha edición inesquecible
O festival puxo o punto e final o domingo cunha xornada pensada para gozar en familia e cun ambiente máis relaxado. O concerto de Gramola Gominola fixo cantar e bailar aos máis pequenos da casa, pechando así tres días de música, convivencia e bo ambiente.
A pesar de que o tempo non acompañou durante parte da fin de semana, o Ourensound Fest 2024 volveu demostrar por que é unha das citas imprescindibles do calendario de festivais en Galicia: unha organización coidada, un recinto cómodo e un público fiel capaz de encher de calor calquera día de chuvia.